بحلم وحلمي بسيط
بحلم وحلمي بسيط جملة تحمل بين كلماتها معنى كبير فالحلم مش لازم يكون ضخم ولا مستحيل أحيانًا أبسط الأمنيات بتكون أكتر حاجة قادرة تفرّح القلب وتخلّي الإنسان يكمل
وأغنية محمد فؤاد بتاخدنا لحالة من الأمل والتمسك بالحلم وتفكرنا إن الإنسان مهما مر بظروف صعبة لازم يفضل عنده شيء بيحلم بيه وبيسعى عشانه
الحياة مش دايمًا بتمشي زي ما إحنا عايزين وفي أوقات كتير ممكن نحس إن أحلامنا بعيدة أو إن الانتظار طال
لكن ده مش معناه إننا نتخلى عنها يمكن اللي بنتمنّاه يتأخر لكن الأمل هو اللي بيخلينا نكمل الطريق
وأنا بحلم أكون نفسي اللي بحلم بيها النسخة اللي أكون راضية عنها وفخورة بيها
وبحلم إني أعيش الحياة اللي شايفة إني أستحقها.. حياة هادئة فيها راحة وأمان ورضا
أنا مؤمنة إن الإنسان يستحق يعيش بالطريقة اللي يتمناها وإن الوصول ممكن يتأخر لكن طول ما عندنا أمل وإصرار مفيش حلم بعيد
وفي النهاية أوعى تفقد الأمل.. وطول ما إنت عايش احلم واتمنى واصبر خليك متمسك بحلمك حتى لو كان بسيط
لأن ممكن حلم صغير في عينك يكون هو السبب في أجمل بداية جديدة في حياتك
بحلم.. وحلمي بسيط لكن طول ما في العمر بقية لسه في أمل ولسه في بكرة.
