زحمة في كل مكان.. ووحدة في كل قلب

زحمة في كل مكان.. ووحدة في كل قلب

زحمة في كل مكان.. ووحدة في كل قلب بقينا عايشين وسط زحمة لا بتنتهي شوارع مليانة وبيوت مليانة وأصوات حوالينا طول الوقت

لكن الغريب إن كل الزحمة دي ماقدرتش تمنع الوحدة

بقينا وسط الناس وأوقات كتير بنحس إننا لوحدنا

زمان كان الواحد لما يتعب يلاقي حد يسمعه

دلوقتي ممكن يكون حواليك عشرات الأشخاص وماتلاقيش واحد تسند عليه

بقينا بنتكلم طول اليوم على الموبايلات

لكن الكلام الحقيقي بينا قل والاهتمام بقى مجرد رسالة سريعة

كل واحد بقى مشغول بحياته وبمشاكله وبجريه وراء لقمة العيش

لحد ما بقينا ننسى نسأل أقرب الناس لينا هما عاملين إيه

والأصعب إن فيه ناس بتضحك وسط الزحمة وهي من جواها مكسورة

بتتكلم وتهزر وتتصور لكن قلبها محتاج حضن وكلمة تطمنه

الوحدة مش معناها إنك قاعد لوحدك

الوحدة الحقيقية إنك تكون وسط الناس وماتلاقيش حد فاهمك

فيه أب محتاج يسمع كلمة حلوة من أولاده

وفيه أم محتاجة تحس إن تعب السنين لسه حد مقدره

وفيه صاحب اختفى من حياتنا ومحدش سأل نفسه هو اختفى ليه

يمكن كان محتاجنا في وقت إحنا كنا مشغولين فيه بأنفسنا

إحنا محتاجين نرجع لبعض .. محتاجين نسأل من القلب ونسمع من غير ما نستعجل ونحكم من غير ما نفهم

مش كل اللي حواليك قريب منك ..ومش كل اللي بعيد عنك ناسيك

أوقات الإنسان بيحتاج شخص واحد بس

شخص يحس بيه من غير ما يطلب ويطمن عليه من غير مناسبة

يمكن رسالة منك تفرق ويمكن مكالمة قصيرة ترجع إنسان للحياة من جديد

عشان كده وسط الزحمة حاول ماتنساش اللي حواليك

اسأل عن أصحابك وأهلك وجيرانك وقول للي بتحبه إن وجوده فارق معاك

لأن الدنيا مهما زحمتنا

أصعب حاجة فيها إن الإنسان يبقى وسط مليون شخص ويحس إنه لوحده

إحنا مش محتاجين ناس أكتر حوالينا…إحنا محتاجين قلوب أقرب لينا