مقال × حدوته
مقال × حدوته هتعيش 120 سنةفي مرة وأنا بقلب بالصدفة في الموبايل ، وقعت عيني على معلومة غريبة ، الإنسان ممكن يعيش لحد 120 سنة .
وقفت عند الجملة شوية ، مش علشان الرقم كبير ، لكن علشان السؤال اللي جه بعده مباشرة ، هو أنا ليه مش هعيش كده؟ .
مشيت في يومي عادي ، قهوة زيادة ، سيجارة بعد الأكل ،
معلقة سكر كمان ، أصل اليوم طويل .
بس المعلومة كانت لسه دايرة جوا دماغي .
120 سنة ؟! ، طب أنا بعمل إيه في نفسي ، بيقولوا إن كل سيجارة بتقص جزء صغير من عمرك ،
وكل ضغط زيادة بيسحب منك حتة هدوء ، وحتة صحة ، وكل إهمال ، مش بيعدي ببلاش .
وقفت مع نفسي أول مرة بجد ، وحسبتها بطريقة غريبة .
مش أنا بعيش كام سنة ، لكن أنا بضيّع كام دقيقة كل يوم ؟! .
سألت نفسي سؤال خضّني شوية ، هو أنا كده ، بموت نفسي بالبطيء؟! .
مش إنتحار مباشر ، لكن إستنزاف مستمر ،
ضغط و قلق و أكل غلط و نوم قليل ، وكأنك كل يوم بتتنازل عن حتة من عمرك ، بإيدك .
بس في نفس اللحظة ،
أفتكرت حاجة أهم ، إن الحياة مش سهلة ، وإن الضغوط مش إختيار ، وإن في ناس بتجري علشان تعيش مش علشان تموت .
وهنا فهمت الحقيقة ، إحنا مش مذنبين بالكامل ، بس إحنا برضه مش أبرياء .
ومن اليوم ده ، ما قررتش أبقى مثالي ، ولا أبطل كل حاجة مرة واحدة ، أنا بس قررت ، أدي لنفسي “وقت إضافي”
سيجارة أقل ، راحة أكتر ،ضحكة زيادة ، وأحاول على قد ما أقدر ماكونش ، سبب في خسارتي .
يمكن ما أوصلش لـ120 سنة ،بس على الأقل ما أبقاش أنا السبب إني ما وصلتش.
وفي النهاية أعلم أن الأعمار بيد الله سبحانه وتعالى ، وأعلم أيضًا أن الله سبحانه وتعالى أعطانا صحة تعيش 120 عامًا .
