مقال × حدوته  مين فيهم ؟

مقال × حدوته  مين فيهم ؟

مقال × حدوته  مين فيهم ؟ كان قاعد لوحده مش ماسك موبايل ولا بيتفرج على حاجة بس ساكت

ساكت بطريقة غريبة كأنه لأول مرة سامع صوته الحقيقي

بص في المراية وقال لنفسه هو أنا مين فيهم

السؤال كان بسيط لكن الإجابة تقيلة

لأنه ببساطة اكتشف إن جواه أكتر من واحد

واحد الناس كلها تعرفه بيضحك في الوقت المناسب يختار كلماته بحساب يتحرك بحذر يحاول دايمًا يبان بالصورة اللي ترضي الناس أو على الأقل ما تزعلهمش

وواحد تاني محدش يعرفه غيره

واحد بيتكلم بحرية بيضحك من غير حساب يزعل من غير ما يخبي ويفكر بصوت عالي من غير ما يخاف من حكم حد

واحد بيعيش بـ لازم

والتاني بيعيش بـ أنا عايز

وهنا كانت الصدمة إنه مش حالة خاصة دي القاعدة مش الاستثناء

كلنا بنعمل كده كلنا عندنا أكتر من نسخة نسخة بنعرضها ونسخة بنخبيها

مش شرط يكون نفاق ومش دايمًا تمثيل بمعناه الوحش أحيانًا بيكون محاولة للتأقلم أو وسيلة نحمي بيها نفسنا أو حتى طريقة نعدي بيها الدنيا بأقل خسائر

بس الحقيقة اللي محدش بيحب يقولها بصوت عالي إن كلنا بنجيد التمثيل

حتى اللي شايف نفسه صريح بيختار يقول إيه ويسيب إيه

حتى اللي بيقول أنا على طبيعتي عنده لحظات بيعدل فيها طبيعته علشان تمشي مع المكان والناس

وأنا هنا مش جاي أقول إني مختلف

ولا ألبس دور المثالي

بالعكس لو دققت في حياتي هلاقي إن عندي شخصية بحاول أحافظ عليها قدام الناس أهذبها أظبطها أقدمها بشكل مقبول

وعندي شخصية تانية أحبها أكتر بكتير

شخصية تظهر لما أبقى لوحدي من غير فلترة من غير حسابات من غير خوف من نظرة حد

يمكن المشكلة مش إن عندنا أكتر من شخصية المشكلة الحقيقية لما ننسى إحنا مين فيهم الأصل

لما الشخصية اللي بنمثل بيها تكبر لدرجة تخنق الحقيقة لما نعيش طول الوقت بنحاول نرضي الناس وننسى نرضي نفسنا لما نخاف نظهر حقيقتنا حتى قدام نفسنا

ساعتها مش بس بنمثل ساعتها إحنا بنضيع

لكن وسط كل ده في لحظات نادرة بنحس فيها بحاجة مختلفة

لما تقابل شخص تلاقي نفسك بتتكلم من غير ما تراجع كل كلمة بتضحك من غير ما تفكر شكلك عامل إزاي بتقول اللي جواك من غير خوف من الحكم

ساعتها أنت مش بتمثل أو على الأقل بتمثل أقل بكتير

الحقيقة إن مفيش إنسان بيعيش بشخصيته السرية الكاملة قدام حد دي منطقة خاصة غالبًا بتفضل ليك لوحدك

لكن كل ما المسافة بين الشخصيتين تقل كل ما الرقابة تخف كل ما الفلترة تقل كل ما الإحساس بالراحة يزيد

وهنا بييجي الفرق

الراحة مش إنك تلاقي حد مثالي ولا إنك تلاقي حد بيشبهك في كل حاجة

الراحة الحقيقية إنك تلاقي حد تقدر تبقى معاه أقرب ما يكون لنفسك

والحب يمكن ما يكونش إنك تتحب بشكل كامل قد ما هو إنك تلاقي حد يقلل المسافة بين اللي بتظهره واللي أنت عليه بجد

في الآخر مش مطلوب منك تبقى شخص واحد طول الوقت لكن مطلوب منك تعرف كويس مين فيهم إنت بجد

ولما تبقى لوحدك وتسأل نفسك نفس السؤال هو أنا مين فيهم

حاول المرة دي ما تهربش من الإجابة