مقال × حدوته الوهم
مقال × حدوته الوهم في شارع هادي ، في منطقة شيك ، تعدي من قدام عمارة شكلها محترم ، تلاقي يافطة جديدة متعلقة “شركة إنتاج فني”
الإسم كبير ، والخط تقيل ، والحلم أكبر من الإثنين.
بعدها بأيام ، تلاقي صفحة على السوشيال ميديا ، صور شيك ، لوجو لامع ،
وإعلان بسيط كده:
“يتم حالياً التحضير لعمل فني ضخم ،
وعلى الراغبين في الإشتراك الحضور لعمل أوديشن”
بس!
ولا كاستينج دايركتور معروف ، ولا مخرج ، ولا حتى عمل سابق ،
لكن الحلم بيكمل الباقي.
يبدأ الزحف ، شباب و بنات ، واحد شايف نفسه نجم ، واحدة شايفة نفسها بطلة ، وغيرهم كتير ، موهوبين بجد ، وكتير موهومين أكتر ما هم موهوبين.
يدخلوا الشقة استقبال و استمارة ابتسامة ، وكلمتين حلوين “املأ الاستمارة بس ، ورسوم بسيطة للتقديم”
رسوم بسيطة؟!آه ، بسيطة على الحلم ، كبيرة لما تتكرر.
يتعمل الأوديشن ، كام مشهد ، كام صورة ،
وأحيانًا تمثيلية أكبر:
“إحنا بدأنا تصوير بالفعل”
يوم تصوير؟ ،يتصرف عليه منين؟ ، من نفس الرسوم اللي اتدفعت.
كل واحد يطلع وهو حاسس إنه قرب ،
قرب قوي ،
بس لسه “مش مناسب للدور دلوقتي”
“بس متقلقش ، في فرصة تانية قريب” ،
وممكن يكون المقابل مش استمارة ، ممكن يكون المقابل خدمات ، أو تسهيلات ، حسب إمكانية المتقدم .
وهنا ، الوهم يشتغل.
مرة تانية ، وثالثة ورابعة ،
والشقة شغالة ، والصفحة شغالة ، والحلم شغال ، لحد ما الموضوع مايبقاش محاولة ، ويبقى مهنة.
مهنة إسمها ، نصابين الفن ، الموجع مش الفلوس ، الموجع إن في ناس بتدفع من عمرها قبل جيبها ، من أملها ، من شغفها ، من تصديقها لنفسها.
الموهوب بيتكسر ، والموهوم بيغرق أكتر ، والنصاب ، بيكبر.
والأصعب من كده؟ ، إن الظاهرة دي بقت واضحة ، وصريحة ، وبتزيد.ولا رقيب ، ولا حساب ،ولا حتى تحذير.
أنا هنا مش بتكلم عن شركات محترمة ، لأن الشركات المحترمة ، عمرها ما بتبيع الحلم ، ولا بتاخد تمن الفرصة.
الفرصة الحقيقية ، بتدور عليك لو تستحقها ،
بس أجتهد وأعمل اللى عليك ،
مش بتطلب منك رسوم علشان تشوفك.
اللي بيحصل ده مش “كاستينج” ، ده “استنزاف”.
مش “فرصة” ، ده “وهم متغلف بحلم”.
ودي مش مجرد حدوته ،
دي جرس إنذار.
لكل حد بيحلم ، خلي حلمك غالي ، مايتباعش على استمارة.
ولكل مسئول ، النوع الجديد من النصب وصل للفن ،
ولو ما اتوقفش ، هيكسر جيل كامل ، قبل ما يمثل أول مشهد في حياته.
الخلاصة:
مش كل يافطة شركة ، تبقى شركة.
ومش كل فرصة ، تبقى حقيقية.
وفي زمن بقى فيه الوهم سهل ،
خلي وعيك هو البطولة الحقيقية.
